Hat sich u. a. mit zwei Apothekern besprochen und rät davon ab, Christoph Klausers Sohn vorzeitig aus der Lehre zu nehmen, da sein Lehrmeister in einem vergleichbaren Fall auf einer hohen Entschädigung bestand und außerdem kaum bereit wäre, die für einen Wechsel erforderliche Zustimmung zu geben; erklärt sich bereit, zu gegebener Zeit bei der Suche nach einer neuen Lehrstelle zu helfen. Über Neuigkeiten können die Zürcher Kaufleute mehr berichten.

S. Ea de re, quam ad me scripsisti 1 , charissime Bullingere, diligenter amicos, et inter eos myropolas duos, consului, qui responderunt e re quidem Clauseri filii esse, ut a suo magistro 2 tempestive liberaretur; sed cum in biennium illi sese mancipaverit, non videre se, qua ratione possit fieri citra magistri gravem offensam et patris dispendio fortasse non mediocri. Quod cur censeant, causa profecto a non est vulgaris, siquidem idem pharmacopola haud ita pridem civis cuiusdam Colmariensis filium ³ (cuius rei testem me habent, nam probe mihi nota est) post bimestre tempus ob nescio quam causam ab eo missionem flagitantem, cum tamen plus quam annuam illi operam esset pactus, adeo aegre dimisit, ut aureis viginti quinque tandem receptis ab adulescentis patre in amicorum id gratiam pro puero deprecantium se fecisse sit testatus. Quod factum hominis, quid sit Clausero sperandum, nihil obscure declarat. Huc accedit, quod leges illorum prohibent quenquam alterius discipulum recipere nisi priore magistro bona venia id permittente. Istud cum fieri posse nemo credat et pacti temporis non longe admodum terminus absit, praestare putant illum expectare; tum facile citraque litigium, ubi nihil ille iuris scilicet in adulescentem habeat amplius, cum alio posse transigi. Horum sententiae ut ego quoque subscribam, hominis illius mores faciunt; etenim, quantum ego video, mavult interim, dum ex pacto licet, simplicis et probi adulescentis opera suum ad commodum uti, quam recepta pecunia, cuius iacturam facere non potest, ante legitimum tempus dimittere. Iam si hoc idem vobis videbitur, tuum erit in tempore mihi significare, ut, si apud alium heic myropolam Christophorus habere deinceps filium cupiat, priusquam terminus advenerit, quis eum et quibus conditionibus sit recepturus, certo vos possim reddere certiores. Haec scripsi lectis obiter literis tuis, quas doctoris Christophori filius mihi reddidit postridie, cum b mercator ille vester ⁴ me nondum convento Francofordiam abiisset. Ego lubens vobis hac in re serviero, quicquid possum, si modo aliquid possum.

Vale cum tuis omnibus feliciter, charissime amice, ac doctorem Christophorum et omnes tuos symmystas, nominatim vero Pellicanum, praeceptorem meum, saluta. Quae hic feruntur nova, melius ex mercatorum vestrorum relatione, quam si ego scriberem, cognosces.

Datum Argentorati, septimo kalendas octobris anno 1537.

Petrus Dasypodius

[Adresse auf der Rückseite:] Eruditione pariter et humanitate perspicuo viro Henrico Bullingero, insignis Tigurinae ecclesiae antistiti, amico suo praecipuo semperque colendo c .